Москванинг «Родина» клуби спорт директори Алексей Зинин Россия чемпионати клубларига таклиф қилинаётган машҳур футболчилар ҳақида гапирди.
«Биз улар билан музокара олиб бормаяпмиз, аммо катта номга эга футболчиларнинг номзодлари бизга таклиф қилинмоқда. Ҳозир бозорда Раҳим Стерлинг ва Адама Траоре каби футболчилар бор. Улар Россия бозорига ҳам таклиф қилинмоқда», — деди Зинин «РБ Спорт»га.
«Родина» жорий мавсум Россия Премьер-лигасида илк бор иштирок этмоқда. Москва клуби дастлабки 6 турда 4 очко тўплаб, турнир жадвалида 13-ўринни эгаллаб турибди.
Жамоа навбатдаги учрашувини 6 сентябрь куни сафарда Махачқаланинг «Динамо» клубига қарши ўтказади.
