«Арсенал», «Барселона» ва Франция терма жамоасининг собиқ ҳужумчиси Тьерри Анри ФИФА атрофидаги можаролар фонида футболчиларни ўз таъсир кучидан фаолроқ фойдаланишга чақирди.

«Футболчилар ўйлагандан кўра кўпроқ таъсир кучига эга. Агар улар ўзгаришларни хоҳлашса, бунга эриша оладилар — айниқса ҳозир», — дея Анрининг сўзларини The Guardian келтирди.

Сўнгги вақтларда ФИФА жиддий танқидларга учрамоқда. Ташкилот президенти Жанни Инфантино турнирнинг тижорий ҳуқуқларини сотишга урингани ҳақидаги хабарлардан сўнг ФИФАга босим янада кучайди.

Анри футболчилар биргаликда ҳаракат қилсалар, жиддий ўзгаришларга эриша олишларини таъкидлади.

«Баъзида улар шунчаки бу кучдан фойдаланмайдилар ёки ўз таъсирлари қанчалик катта эканини англамайдилар. АҚШда сиз буни яхши биласиз: футболчилар нимагадир эришишни хоҳлашса, лига уларнинг фикрига қулоқ тутади. Биз буни НБА ва НФЛда кўрганмиз», — дея қўшимча қилди француз.

ФИФА президенти сайлови 2027 йил 18 мартга белгиланган. Инфантино 2016 йилдан бери икки марта қайта сайланган ва ҳар сафар унга рақиб бўлмаган.