Машҳур инсайдер Фабрицио Романо «Челси» ва «Монако» вакиллари ўртасида юзага келган низо ҳақида фикр билдирди.
Ёзги трансфер ойнаси ёпилиши олдидан томонлар ярим ҳимоячи Ламин Камара трансфери бўйича барча шартларни келишиб олган эди. Сенегаллик футболчи «кўклар» сафига қўшилиши керак эди, аммо монегасклар сўнгги дақиқада трансферни бекор қилиб, Лондон клуби раҳбариятининг қаттиқ ғазабига сабаб бўлди.
«Мен бутун фаолиятим давомида “Челси” директорларини бундай ғазабланган ҳолда атиги бир неча марта кўрганман. Ўйлайманки, яқин йилларда “Челси” ва “Монако” ўртасидаги трансферларни деярли кўрмаймиз», — деди Романо ўз подкастида.
Ламин Камаранинг трансфери инглиз клубига 55 миллион еврога тушиши мумкин эди.
