"Барселона" ҳужум чизиғини Габриэл Жезус билан кучайтирди. Каталонияликлар дастлаб Хулиан Альварес трансфери устида ишлаган, бироқ "Атлетико" билан келишувга эришиш қийинлашгач, эътиборини бразилиялик форвардга қаратган.
Маълумотларга кўра, Жезуснинг ўзи "Барселона" сафида тўп тепиш истагини билдирган. Бош мураббий Ҳанси Флик ва спорт директори Деку ҳам футболчининг имкониятларини юқори баҳолаб, унинг трансферига ижобий муносабат билдирган.
Шу билан бирга, каталонияликлар келишувни якуний босқичга олиб чиқишдан аввал 29 ёшли ҳужумчининг жисмоний ҳолатига алоҳида эътибор қаратган. Хусусан, унинг тиззалари батафсил тиббий текширувдан ўтказилган. Шифокорлардан ижобий хулоса олингач, трансферга "яшил чироқ" ёқилган.
Келишув "Барселона" учун молиявий жиҳатдан ҳам мақбул шартларда амалга оширилди. Жезус Каталония клубига ўтиш учун маошини камайтиришга рози бўлди.
Бразилиялик футболчи "Барселона" билан уч мавсумга — 2029 йилга қадар мўлжалланган шартнома имзолади.
