"Barselona" hujum chizig‘ini Gabriel Jezus bilan kuchaytirdi. Kataloniyaliklar dastlab Xulian Alvares transferi ustida ishlagan, biroq "Atletiko" bilan kelishuvga erishish qiyinlashgach, e’tiborini braziliyalik forvardga qaratgan.
Ma’lumotlarga ko‘ra, Jezusning o‘zi "Barselona" safida to‘p tepish istagini bildirgan. Bosh murabbiy Hansi Flik va sport direktori Deku ham futbolchining imkoniyatlarini yuqori baholab, uning transferiga ijobiy munosabat bildirgan.
Shu bilan birga, kataloniyaliklar kelishuvni yakuniy bosqichga olib chiqishdan avval 29 yoshli hujumchining jismoniy holatiga alohida e’tibor qaratgan. Xususan, uning tizzalari batafsil tibbiy tekshiruvdan o‘tkazilgan. Shifokorlardan ijobiy xulosa olingach, transferga "yashil chiroq" yoqilgan.
Kelishuv "Barselona" uchun moliyaviy jihatdan ham maqbul shartlarda amalga oshirildi. Jezus Kataloniya klubiga o‘tish uchun maoshini kamaytirishga rozi bo‘ldi.
Braziliyalik futbolchi "Barselona" bilan uch mavsumga — 2029 yilga qadar mo‘ljallangan shartnoma imzoladi.
