Ўзбекистон Суперлигасининг 20-туридан ўрин олган "Навбаҳор" — "Локомотив" учрашуви 1:1 ҳисобида якунланди.

Наманган марказий стадионида кечган баҳсда ҳисоб 40-дақиқада очилди. Муҳаммадали Усмоновнинг узатмасидан сўнг Ҳусайн Норчаев тўпни дарвозага йўллаб, "Навбаҳор"ни олдинга олиб чиқди.

Мезбонлар танаффусга минимал устунлик билан йўл олди. Бироқ иккинчи бўлимда "Локомотив" жавоб голини топди. 61-дақиқада захирадан майдонга тушган Жасур Яхшибоев 72-дақиқада Билол Туплиевнинг узатмасини голга айлантириб, мувозанатни тиклади.

Қолган вақтда жамоалар ғалаба голини ура олмади ва учрашув 1:1 ҳисобида якунланди.

Шу тариқа, мазкур баҳсга қадар Суперлигада кетма-кет 6 та ўйинда ғалаба қозонган "Навбаҳор"нинг ғалабали серияси тўхтади. "Локомотив" эса Наманган сафаридан бир очко билан қайтди.