«Реал» бош мураббийи Жозе Моуринью Испания Ла Лигасининг 2026/2027 йилги мавсуми 4-туридан ўрин олган «Бетис»га (0:1) қарши учрашувдаги ҳакамлик ҳақида фикр билдирди. Ўйин бош ҳаками сифатида Алехандро Эрнандес ишлади.

«У менга нима учун огоҳлантириш берганини билмайман, аммо уни қабул қиламан. Мен захира ўриндиғидан ўрнимдан турдим, чунки «Бетис» футболчиси, шекилли, айнан бизнинг олдимизда йиқилди. Аммо аниқ айта олмайман, чунки захира ўриндиғидаги кўплаб хафа бўлган одамларнинг экрандаги такрорий лавҳаларни томоша қилаётганини кўрдим. Менимча, у ўйинни ўз маромида давом эттирди. Биринчи бўлимда огоҳлантиришларни қандай кўрсатгани менга ёқди, «Бетис» футболчилари эса танаффусгача ҳеч қандай карточка олмади.

Аммо натижага битта сариқ карточка сабаб бўлди, деб айтиб бўлмайди. Балки эртага ўйинни кўриб чиққач, фикрим ўзгариши мумкин. Лекин бугун захира ўриндиғидан кўрганларимга қараб, мағлубиятимиз сабабини тушуна олмаяпман. Жамоа жуда муносиб кўринишда бўлди ва менда ҳеч кимга нисбатан шахсий эътироз йўқ.

Бироқ ғалабага лойиқ бўлганинг очко олиб келмайди. «Бетис»ни табриклайман — улар дуранг учун ўйнашди ва омад улар томонида бўлди», — дея Моуриньюнинг сўзларини Marca келтирди.

Ла Лиганинг 4-туридан кейин «Бетис» 9 очко билан 3-ўринда бормоқда. Жозе Моуринью жамоаси ҳам 9 очко тўплаган, аммо қўшимча кўрсаткичлар ҳисобига 2-поғонани эгаллаб турибди.