“Арсенал” бош мураббийи Микель Артета ёзги трансферлар ойнасида жамоанинг ҳужум чизиғи етарлича кучайтирилмагани ҳақидаги танқидларга жавоб қайтарди.
Лондон клуби ёзги трансфер ойнаси вақтида Габриэль Мартинелли, Габриэль Жезус ва Леандро Троссард билан хайрлашди. Мартинелли 60 миллион фунт эвазига “Ал-Ҳилол”га, Жезус 8,5 миллион фунтга “Барселона”га, Троссард эса 17,1 миллион фунт эвазига “Бешиктош”га ўтди.
“Арсенал” уларнинг ўрнига ҳужум чизиғига фақат “Брюгге”дан 34 миллион фунт эвазига Христос Тзолисни трансфер қилди. Натижада чап қанотда Тзолис ва Эберечи Эзе, марказий ҳужумда эса Кай Ҳаверц, Виктор Гёкереш ҳамда Микель Мерино асосий вариантлар сифатида кўрилмоқда.
Артета таркибнинг қисқаргани ҳақидаги танқидларни рад этди. Унинг таъкидлашича, футболчиларни сотиш қарори уларнинг майдондаги ўйин вақти ҳамда жароҳатлар билан боғлиқ ҳолатлари инобатга олинган ҳолда қабул қилинган.
“Бизда яхши футболчилар бор. Мавжуд таркибдан мамнунмиз”, дейди Артета.
Мураббий, шунингдек, Габриэль Мартинелли билан хайрлашиш қарори ҳақида ҳам фикр билдирди. У бразилиялик футболчининг жамоа ривожига катта ҳисса қўшганини таъкидлади:
“Мен Габи билан ишлаганимдан миннатдорман. У футболчи ва инсон сифатида катта ўсишга эришди. Унинг клубга қўшган ҳиссаси жуда катта”.
“Арсенал” мухлисларининг бир қисми трансфер ойнасидаги клуб сиёсатидан норози бўлди. Бунга Артетанинг аввалроқ клуб трансфер бозорида тезкор, ақлли ва катта мақсадлар билан иш олиб боришини айтгани сабаб бўлди.
Мураббий трансферлар борасидаги барча мақсадлар амалга оширилганини таъкидлади.
“Барчаси 100 фоиз бажарилди. Якуний натижа ҳар доим ҳам кутгандек бўлмаслиги мумкин, аммо ниятимиз аниқ эди”, деди испаниялик мутахассис.
Маълумот учун, 44 ёшли Микель Артета 2019-йилдан буён “Арсенал”ни бошқариб келмоқда. У Лондон жамоаси билан Англия Кубоги, уч марта Англия Суперкубоги ҳамда ўтган мавсумда Англия чемпионлигини қўлга киритди ва клубга 22 йил кутилган кутилган кубокни олиб келди.
Бундан ташқари, Микель Артета 2025/2026-йилги мавсумда АПЛнинг энг яхши мураббийи деб топилган.
