"Ливерпуль" ҳужумчиси Коди Гакпо "Манчестер Сити"га режалаштирилган трансфери амалга ошмай қолгани сабаб 15 миллион евродан ортиқ маблағдан қуруқ қолиши мумкин.

De Telegraaf маълумотига кўра, "Манчестер Сити" Гакпога "Ливерпуль"да олаётган маошидан анча юқори маош таклиф қилишга тайёр бўлган. Нидерландиялик футболчи беш йиллик шартнома давомида ҳар йили бир неча миллион евро кўпроқ даромад олиши кутилган.

Хабарларга кўра, Гакпонинг ўзи ҳам трансферга қизиқиш билдирган ва "Манчестер Сити" билан шахсий шартнома шартлари бўйича келишувга эришган. Бу ўтиш унинг фаолиятидаги катта қадам сифатида баҳоланган.

"Ливерпуль" ва "Манчестер Сити" 100 миллион евродан ортиқ қийматга эга бўлиши мумкин бўлган трансферни бир неча ҳафта давомида муҳокама қилган.

Бироқ якунда "Ливерпуль" футболчини қўйиб юборишдан бош тортган. Клуб Премьер-лигадаги энг асосий рақибларидан бирини кучайтириб қўйишдан хавотир олган.

Бу қарор Гакпонинг "Этиҳад"га ўтишни жуда истагани ҳақидаги хабарларга қарамай қабул қилинган.

De Telegraaf шунингдек, "Ливерпуль"нинг янги эгаларидан бири, Amazon асосчиси Жефф Безоснинг клубга келиши трансфер бўйича қарор ўзгаришига таъсир қилган бўлиши мумкинлигини ҳам таъкидламоқда.

Безос консорциуми келажакда "Ливерпуль"нинг назорат пакетини қўлга киритиш имкониятига эга. Бироқ унинг клубга кириб келиши Гакпонинг амалга ошмай қолган трансферига қай даражада таъсир қилгани ҳозирча аниқ эмас.