"Liverpul" hujumchisi Kodi Gakpo "Manchester Siti"ga rejalashtirilgan transferi amalga oshmay qolgani sabab 15 million yevrodan ortiq mablag‘dan quruq qolishi mumkin.

De Telegraaf ma’lumotiga ko‘ra, "Manchester Siti" Gakpoga "Liverpul"da olayotgan maoshidan ancha yuqori maosh taklif qilishga tayyor bo‘lgan. Niderlandiyalik futbolchi besh yillik shartnoma davomida har yili bir necha million yevro ko‘proq daromad olishi kutilgan.

Xabarlarga ko‘ra, Gakponing o‘zi ham transferga qiziqish bildirgan va "Manchester Siti" bilan shaxsiy shartnoma shartlari bo‘yicha kelishuvga erishgan. Bu o‘tish uning faoliyatidagi katta qadam sifatida baholangan.

"Liverpul" va "Manchester Siti" 100 million yevrodan ortiq qiymatga ega bo‘lishi mumkin bo‘lgan transferni bir necha hafta davomida muhokama qilgan.

Biroq yakunda "Liverpul" futbolchini qo‘yib yuborishdan bosh tortgan. Klub Premyer-ligadagi eng asosiy raqiblaridan birini kuchaytirib qo‘yishdan xavotir olgan.

Bu qaror Gakponing "Etihad"ga o‘tishni juda istagani haqidagi xabarlarga qaramay qabul qilingan.

De Telegraaf shuningdek, "Liverpul"ning yangi egalaridan biri, Amazon asoschisi Jeff Bezosning klubga kelishi transfer bo‘yicha qaror o‘zgarishiga ta’sir qilgan bo‘lishi mumkinligini ham ta’kidlamoqda.

Bezos konsorsiumi kelajakda "Liverpul"ning nazorat paketini qo‘lga kiritish imkoniyatiga ega. Biroq uning klubga kirib kelishi Gakponing amalga oshmay qolgan transferiga qay darajada ta’sir qilgani hozircha aniq emas.