Рубен Диаш "Манчестер Сити" таркибидаги катта ўзгаришларни футболнинг табиий бир қисми деб ҳисоблайди ва янги футболчилар жамоага муваффақият учун курашни давом эттиришда ёрдам беришига ишонади.
"Сити" ёзги трансфер ойнасида жуда фаол бўлди. Жамоанинг бир қатор муҳим футболчилари клубни тарк этди, уларнинг ўрнига эса "Этиҳад"га кўплаб янги ўйинчилар келди.
Диаш ўзгаришлар кўлами сезиларли бўлганини, айниқса сўнгги уч йил ичида жамоани тарк этган футболчилар сонига эътибор берилса, бу яққол кўринишини тан олди.
"Бу биз яшаётган футбол муҳитининг бир қисми. Янги одамлар келади, бошқалар кетади. Балки бу ёз жамоани тарк этганлар сони бўйича энг катта ўзгариш бўлгандир. Агар сўнгги уч йилни ҳисобга олсак, кетганлар жуда кўп.
Бу бир цикл. Ҳар бир янги футболчи бу ерга муайян сабаб билан келади ва бу сабаб биз ҳам аввал бу ерга келганимиздаги мақсад билан бир хил.
Бу — ғалаба қозониш ва энг юқори чўққига чиқиш. Биз қўлимиздан келганича юқори натижаларга эришишга ҳаракат қилишимиз керак. Бу жуда ҳаяжонли ва яна шу жараённинг бир қисми бўлиш ёқимли ҳис", — деди Рубен Диаш.
