«Телстар» Нидерландия чемпионатининг 5-турида ўз майдонида «Камбур» билан 2:2 ҳисобида дуранг ўйнади.

Мезбонлар 22-дақиқада бир киши кам бўлиб қолди. Ҳужумчи Ноккви Ториссон қизил карточка олиб, майдондан четлатилди.

«Камбур» Рафик Эль Аргиуининг 53-дақиқадаги ва Николас Биндернинг 60-дақиқадаги голларидан сўнг 2:0 ҳисобида олдинга чиқиб олди.

Шундан кейин «Телстар» дарвозабони кичик Роналд Куман жамоасини қутқарди. У 63-дақиқада пенальтини аниқ амалга ошириб, ҳисобни қисқартирди. 90+11-дақиқада эса яна бир 11 метрлик зарбани голга айлантириб, ҳисобни тенглаштирди.

Кичик Роналд Куман — «Барселона» ва Нидерландия терма жамоасининг собиқ ҳимоячиси Роналд Куманнинг ўғли. 31 ёшли дарвозабон «Телстар»нинг асосий пенальти тепувчиси ҳисобланади.

У 2025/26 йилги Нидерландия чемпионатининг 34-турида ҳам «Волендам»га қарши ўйинда пенальтидан гол урган эди. Ўша учрашувда «Телстар» 2:1 ҳисобида ғалаба қозониб, Эредивизидаги ўрнини сақлаб қолган.