Франция терма жамоасининг собиқ ҳужумчиси Кристоф Дюгарри Килиан Мбаппенинг «Олтин тўп» ҳақидаги фикрларига муносабат билдирди.
Эслатиб ўтамиз, «Реал» ҳужумчиси совринни ўзига беришини айтган эди: «Аммо бизда фикр диктатураси йўқ, бошқаларнинг фикрини ҳам тушунаман. Аргументлар ва рақобатга қараганимда, бу совринни менга бериш адолатсизлик бўлмас эди, деб ўйлайман».
«Нега Мбаппе дунёнинг энг яхши футболчиси бўла олмайди? Ўтган мавсумда у 44 та гол урди, жаҳон чемпионатларида урилган голлар бўйича рекордни янгилади. Бугун ким Мбаппедан яхшироқ эканини айта олади? У мукаммал бўлмаса ҳам, чемпион бўлмаган, жаҳон чемпионатини ютиб олмаган бўлса ҳам, бу шахсий мукофот ва у ўз имкониятларини ҳимоя қилишга ҳақли.
Бу шундай мавсум бўлдики, ҳеч бир футболчи ҳақиқатан ҳам бошқалардан яққол ажралиб турмади. Шунинг учун якуний хулоса чиқариш қийин. Ҳеч ким ҳам индивидуал, ҳам жамоавий даражада барча совринларни қўлга киритмади. Ҳеч ким шунчалик ажойиб ўйин кўрсатмадики, унинг ғалабаси олдиндан аниқ бўлсин.
Менимча, Мбаппе бу совринга муносиб. У ўзини ҳамма нарсага эришган ёки мутлақо буюк футболчи деб айтмаяпти. У ўз позициясини ҳимоя қилмоқда ва бу бошқа масала. Аммо буни шундай тарзда баён қилишни тушуниш мен учун қийин. Чемпионлик, Чемпионлар лигаси ёки жаҳон чемпионатини ютиб олмаган бўлсанг, шахсий мукофотларни сўраш жуда болаларча ва ачинарли. Менимча, бу мутлақо ўринсиз.
Бундан ташқари, бугун футбол тобора индивидуаллашиб бораётганини кўряпман ва бу менда нафрат уйғотади. Ўзинг ва шахсий мукофотлар ҳақида гапириш ўрнига, жамоа, муваффақиятни биргаликда баҳам кўриш ва биргаликда қўлга киритмоқчи бўлган, аммо уддалай олмаган совринлар ҳақида гапириш керак.
Шунга қарамай, у ўзини дунёнинг энг яхши футболчиси деб ҳисоблаётганини тушунаман. Гарчи умуман олганда, бундай ёндашувга қўшилмасам ҳам», — деди Дюгарри RMC Sport телеканалидаги Rothen s’enflamme дастурида.
