«Вильярреал» ҳимоячиси Сантьяго Моуриньо Чемпионлар лигаси 1-турида Дортмунднинг «Боруссия» клубига қарши ўйиндан сўнг ҳакамликдан норози бўлди. Испания клуби мазкур баҳсда 2:3 ҳисобида мағлубиятга учради.

«Биз ҳакам хатоси сабаб ютқаздик. У ерда пенальти йўқ эди, уни белгилаш керак эмасди ва айнан шу эпизод бизга ўйинни бой бердирди. Бундай шароитда ўйнаш жуда қийин.

Мен уни ушлаб турдим, у ҳам мени ушлаб турган эди. Ҳакам майдондаги босимга берилди ва пенальти белгилади», — дея Моуриньонинг сўзларини Marca келтиради.

«Биз ўтган Чемпионлар лигасидагига ўхшаш вазиятга яна дуч келдик. Рақибдан яхшироқ эканимизни кўрсатдик, аммо уч очкони қўлга кирита олмадик. Ҳакам хатоси туфайли ғалабасиз қолдик», — деди футболчи.

«Вильярреал» Чемпионлар лигасидаги кейинги ўйинини 13 октябрь куни «Наполи»га қарши ўтказади.