«Фейеноорд» бош мураббийи Жованни ван Бронкхорст Чемпионлар лигаси умумий босқичининг 1-турида «Барселона»дан учралган 1:5 ҳисобидаги мағлубият ҳақида фикр билдирди.

«Менимча, ҳозир биз дунёнинг энг яхши жамоасига қарши ўйнадик. Биз ўз футболимизни намойиш этишга ҳаракат қилдик. Фақат ҳимояга ётиб олмадик. Ғалаба билан табриклаганимда, Ханси Флик ҳам менга шуни айтди. Биз жуда эрта — 3-дақиқадаёқ гол ўтказиб юбордик. Аммо якунда ўз ўйинимизни кўрсатишга ҳаракат қилдик», — деди мутахассис RTL нашрига берган интервьюсида.

Ван Бронкхорст ўз жамоасининг ҳаракатларини ҳам танқид қилди.

«Биз бир нечта голни ўз хатоларимиз туфайли ўтказиб юбордик. Биринчи гол вазиятида рақиб футболчисини кузатмадик, яна бир гол эса жарима зарбасидан кейин деворимиз орасидан ўтиб кетди. Аммо босимга қарамай, айрим вазиятларда яхши ўйнадик. Таркибимдаги 18 футболчи учун бу Чемпионлар лигасидаги биринчи ўйин эди. Улар бу тажрибадан хулоса чиқаришлари керак», — деди ван Бронкхорст.