Мадриднинг «Атлетико» сардори Коке жамоадоши Хулиан Альваресни қўллаб-қувватлади.

Аргентиналик ҳужумчининг ёз давомида «Барселона» ва «Арсенал»га ўтиши мумкинлиги ҳақида кўп гапирилди, аммо трансфер амалга ошмади. Форварднинг ўзи ҳам кетиш истагини очиқ билдирган ва маълум бўлишича, фаолиятини Каталония клубида давом эттиришни хоҳлаган. Бироқ «матрасчилар» принципиал сабабларга кўра ўз юлдузини чемпионатдаги рақибига сотмади.

«Хулианни тинч қўйинглар. Биз бундан жуда чарчадик. Йигит футбол ўйнасин, ундан завқ олсин ва ўз ишини қилсин. Унга дам олишга имкон беришингизга ва безовта қилмаслигингизга умид қиламан», — дея Кокенинг сўзларини журналист Фабрицио Романо келтирди.

Чоршанба куни Хулиан Альварес Чемпионлар лигасида «Ливерпуль»га қарши ўйинда голли узатма берди, аммо «Атлетико» барибир 1:2 ҳисобида мағлуб бўлди.