"Манчестер Юнайтед" афсонаси Райан Гиггз клуб Килиан Мбаппени ҳали "Монако"даги ёш футболчи пайтида кузатгани, аммо уни трансфер қилишдан воз кечганини маълум қилди.
Гиггзнинг айтишича, воқеа 2015 йилда, у "МЮ" мураббийлар штабида ишлаётган пайтда содир бўлган. Францияда дам олаётган вақтида бир мухлис унга Мбаппега эътибор қаратишни тавсия қилган. Кейинчалик Гиггз ҳамкасби Альберт Стёйвенберг билан футболчини кузатиб, унинг салоҳиятидан қаттиқ таассуротланган.
Шундан сўнг "Манчестер Юнайтед" скаутларига Мбаппени кузатиш топширилган. Бироқ клуб скаутлари ёш ҳужумчининг истиқболига тўлиқ ишонч билдирмаган ва трансферни амалга ошириш ғоясидан воз кечган.
Орадан кўп ўтмай, Мбаппе "Монако"да порлаб, Европа футболидаги энг катта истеъдодлардан бирига айланди. Кейинчалик у ПСЖга ўтиб, фаолиятида янги босқични бошлади. Гиггзнинг бу ҳикояси эса "Манчестер Юнайтед" тарихидаги энг катта қўлдан чиқарилган имкониятлардан бири сифатида баҳоланмоқда.
