"Manchester Yunayted" afsonasi Rayan Giggz klub Kilian Mbappeni hali "Monako"dagi yosh futbolchi paytida kuzatgani, ammo uni transfer qilishdan voz kechganini ma’lum qildi.

Giggzning aytishicha, voqea 2015 yilda, u "MYU" murabbiylar shtabida ishlayotgan paytda sodir bo‘lgan. Fransiyada dam olayotgan vaqtida bir muxlis unga Mbappega e’tibor qaratishni tavsiya qilgan. Keyinchalik Giggz hamkasbi Albert Styoyvenberg bilan futbolchini kuzatib, uning salohiyatidan qattiq taassurotlangan.

Shundan so‘ng "Manchester Yunayted" skautlariga Mbappeni kuzatish topshirilgan. Biroq klub skautlari yosh hujumchining istiqboliga to‘liq ishonch bildirmagan va transferni amalga oshirish g‘oyasidan voz kechgan.

Oradan ko‘p o‘tmay, Mbappe "Monako"da porlab, Yevropa futbolidagi eng katta iste’dodlardan biriga aylandi. Keyinchalik u PSJga o‘tib, faoliyatida yangi bosqichni boshladi. Giggzning bu hikoyasi esa "Manchester Yunayted" tarixidagi eng katta qo‘ldan chiqarilgan imkoniyatlardan biri sifatida baholanmoqda.