Маурисио Почеттинонинг фикрича, 2016/17 йилги Англия Премьер-лигаси чемпионлиги «Челси»дан олиниб, ўша мавсумда иккинчи ўринни эгаллаган «Тоттенхэм»га берилиши керак.

Ўша мавсумда Почеттино бошқарган «Тоттенҳэм» 86 очко билан иккинчи бўлган ва Антонио Конте бошчилигидаги «Челси»дан 7 очко ортда қолган.

Бироқ 2022 йилда клуб Роман Абрамовичдан янги эгаларга ўтгач, «Челси» 2011–2018 йилларда трансферлар жараёнида рўйхатдан ўтмаган агентлар ва воситачиларга яширин равишда жами 47 миллион фунт тўланганини тан олган. Клуб раҳбарияти Англия Футбол ассоциацияси қоидалари бузилган 74 та ҳолатни ҳам мустақил равишда маълум қилган.

«Биз Премьер-лигада ғолиб бўлишимиз керак эди. Агар бу ҳақиқат бўлса, ўша йили чемпионликка айнан биз лойиқ эдик. Улар жазоланди ва айбини тан олдими? Унда ҳаммаси аниқ. Титул иккинчи ўринни эгаллаган жамоага берилиши керак.

Албатта, улар гол урди ва ўйинларда ғалаба қозонди, дейиш мумкин. Аммо мавсум бошланишидан олдин биз тенг шароитда эмасдик. Агар ҳамма бир хил қоидаларга амал қилганида, балки биз ҳам жамоани кучайтирадиган ёки кўпроқ гол уришимизга ёрдам берадиган футболчиларни харид қилган бўлардик.

Мен ҳақиқатни айтишдан заррача ҳам қўрқмайман. «Челси» мухлислари мендан хафа бўлиши мумкин. Аммо агар «Тоттенхэм» қоидаларни бузганида ҳам худди шу гапни айтган бўлардим», — деди Почеттино.