«Реал» дарвозабони Тибо Куртуа клуб билан шартномасини узайтириш бўйича келишувга эришди. Бу ҳақда журналист Фабрицио Романо хабар берди.

34 ёшли бельгиялик футболчининг амалдаги шартномаси 2026/27 йилги мавсум охиригача мўлжалланган. Янги келишув эса камида яна бир мавсум — 2028 йил ёзигача амал қилиши кутилмоқда.

Куртуа 2018 йил ёзидан буён «Реал» шарафини ҳимоя қилиб келмоқда. У Мадрид клуби сафида барча мусобақалар ҳисобида 338 та ўйин ўтказган ва шуларнинг 130 тасида ўз дарвозаси дахлсизлигини сақлаб қолган.

Куртуа «Реал» билан уч марта Испания чемпиони бўлган, икки марта Чемпионлар лигасида ғолиб чиққан. Шунингдек, у уч мартадан Испания Суперкубоги ва УЕФА Суперкубогини, бир мартадан Испания кубоги, клублар ўртасидаги жаҳон чемпионати ва Қитъалараро кубокни қўлга киритган.