«Реал» бош мураббийи Жозе Моуринью Ла Лиганинг 5-туридан ўрин олган «Райо Вальекано»га қарши учрашув олдидан жамоадаги кайфият ҳақида гапирди.

«Биз бахтлимиз, жамоа бирлашган, яхши ишлаяпмиз ва тикланяпмиз. Бугун рақибга етарлича эътибор қаратган ҳолда тактик машғулот ўтказдик. Улар бу ўйинга ғалабадан кейин етиб келмоқда.

Биз максимал даражада концентрацияни сақлашимиз керак. Беньятга мен ҳақимда айтган жуда илиқ сўзлари учун миннатдорлик билдирмоқчиман. Эртага уни қучоқлаш имконим бўлади», — дея Моуриньюнинг сўзларини Marca келтирди.

Аввалроқ «Райо Вальекано» бош мураббийи Беньят Сан Хосе Моуриньюни футбол тарихидаги энг яхши мураббийлардан бири деб атаган эди. У, шунингдек, «Реал»га қарши ўйин олдидан рақиб таркибидан бир кишини олиб ташлаш имкони бўлса, айнан португалиялик мутахассисни танлашини айтган.

«Реал» — «Райо Вальекано» учрашуви 12 сентябрь куни «Сантьяго Бернабеу» стадионида бўлиб ўтади.