«Барселона»нинг бразилиялик ҳужумчиси Рафинья Диас клуб билан янги шартнома тузиши мумкин. Бу ҳақда Barça Universal бошқа манбаларга таяниб хабар берди.

Таъкидланишича, «кўк-анорранглилар» аллақачон Рафинья билан янги шартнома борасида иш олиб бормоқда. Томонлар музокаралар ўтказмоқда. Ҳужумчи клубда қолиш учун Саудия Арабистонидан тушган сердаромад таклифларни ҳам рад этган.

Жорий мавсумда Рафинья марказий ҳужумчи позициясида ҳаракат қилмоқда. У барча турнирлардаги бешта учрашувда 8 та гол ва 1 та голли узатма қайд этган.

29 ёшли бразилиялик футболчининг «Барселона» билан амалдаги шартномаси 2028 йил июнь ойи охирига қадар мўлжалланган.