Ўзбекистон Тасвирий санъат галереясида шахмат бўйича дунёнинг 12 нафар етакчи гросмейстерлари иштирокида ўтказилаётган Халқаро шахмат федерацияси – (FIDE) Гран-присида 8-тур учрашувлари бўлиб ўтди.

Ушбу турда ҳамюртимиз Нафиса Мўминова украиналик Екатерина Лагнога қарши дона сурди ва томонлар якунда дурангга имзо чекишди.

Саккизинчи турда, шунингдек, хитойлик Цзю Веньцзюнь ва қозоғистонлик Гулисхон Накбоева, арманистонлик Элина Даниэлян ва грузиялик Бела Хотенашвили, болгариялик Антоанета Стефанова ва ҳиндистонлик Харика Дроновалли ўртасидаги партияларда ҳам дуранг натижа қайд этилди. Россиялик шахматчиларнинг ўзаро баҳсида Ольга Гирья Александра Костенюк устидан зафар қучган бўлса, Ҳиндистон вакили Хампи Конеру хитойлик Чжао Сюэни мағлубиятга учратди.

Саккизинчи турдан сўнг турнир жадвалида Хампи Канеру 6,5 очко жамғарган ҳолда якка пешқадамлик қилмоқда. Харика Дронавалли ва Екатерина Лагно ҳисобида 5,5 тадан очко мавжуд ва улар 2-3 ўринларни эгаллаб туришибди. Нафиса Мўминова ҳисобида 8 имкониятдан 3 очко мавжуд.

Бугун ўтказиладиган 9-турда Нафиса Мўминова болгариялик Антоанета Стефановага қарши дона суради.


Тўққизинчи турнинг қолган партияларида қуйидаги шахматчилар ўзаро куч синашадилар:
Харика Дронавалли (2475) – Александр Костенюк (2495)
Чжао Сюэ (2579) – Екатерина Лагно (2532)
Бела Хотенашвили (2514) – Хампи Канеру (2607)
Гулисхан Накшбаева (2307) – Элина Даниелян (2470)
Ольга Гиря (2439) – Цзюй Вэньцзюнь (2535)