«Реал» бош мураббийи Жозе Моуриньо жамоанинг прессингдан фойдаланиб ўйнаши ҳақидаги саволга жавоб берди.

— Юқори прессинг ва рақиб майдонининг юқори қисмида тўпни қайтариб олиш сиз ўзингиз бошқараётган «Реал»да кўришни истайдиган асосий хусусиятлардан бири, деб айтиш мумкинми? Бундай ўйинни 90 дақиқа давомида қандай сақлаб қолиш мумкин?

«Менимча, 90 дақиқа давомида юқори прессинг қилишнинг иложи йўқ. Бу бизнинг услубимиз эмас, кўплаб жамоаларда ҳам бундай эмас. Биз юқорида жойлашганимизда шундай ҳаракат қила олишимиз керак. Пастроқ жойлашганимизда эса бошқача ҳаракат қилишни билишимиз зарур. Ҳимояда янада мукаммал жамоа бўлиш учун ҳар икки усулни ҳам қўллай олишимиз керак.

Мен паст блокда ҳимояланишни ёқтирмайман, аммо айрим футболчилар ва жамоаларнинг ўзига хос хусусиятлари бундай услубга кўпроқ мос келади. Мен ўзимга ёқадиган нарсалар билан футболчиларимнинг сифатлари ўртасида зиддият бўлишини истамайман. Жамоамизни белгилаб берадиган услубни топишга ҳаракат қиламан. Мен учун бу — юқори прессинг қилиш, тўпни юқорида қайтариб олиш ва ҳужумдан ҳимояга ўтиш жараёнида рақибни уч-тўрт сония ичида жазолай олиш қобилияти.

Рақибнинг ўз кучли жиҳатлари бўлиши мумкин, аммо мен жамоамиз: «Майли, биз қарши ҳужумларда кучлимиз ва тезкор ҳужумда рақибни жазолай оладиган футболчиларимиз бор, шунинг учун паст блокда ҳимояланайлик», деб ўйлашини истамайман. Бундай фикрлашни хоҳламайман. Мувозанатни излаш керак», — деди Моуриньо матбуот анжуманида.

Дам олиш кунлари «Реал» «Райо Вальекано»ни 4:1 ҳисобида йирик мағлубиятга учратди.