Саудия Арабистони футбол федерацияси собиқ «Ливерпуль» ва Португалия терма жамоаси қанот ҳужумчиси Диогу Жотанинг номини бақирган мухлисларнинг ҳаракатларини қоралаб, расмий баёнот берди. Миллий чемпионатнинг 7-туридаги «Ал-Таавун» — «Ал-Ҳилол» (0:6) учрашуви вақтида мезбонларнинг бир нечта мухлиси меҳмонлар ярим ҳимоячиси Рубен Невешни провокация қилиш мақсадида Жотанинг номини бақирган.

«Саудия Арабистони футбол федерацияси ва Саудия Арабистони Профессионал лигаси “Ал-Таавун” ва “Ал-Ҳилол” ўртасидаги учрашув вақтида айрим мухлислар томонидан содир этилган номақбул хатти-ҳаракатларни қоралайди. Юз берган ҳолат Саудия футболи қадриятлари ва спорт маҳорати тамойилларига зид.

Фожиалардан провокация мақсадида фойдаланиш номақбул хатти-ҳаракат эканини ва Саудия футболида бундай ҳолатларга ўрин йўқлигини таъкидлаймиз. Саудия Арабистони футбол федерацияси тегишли қўмиталар амалдаги қоидалар ва тартиб-таомилларга мувофиқ зарур чораларни кўришини тасдиқлайди. Жараён якунланганидан сўнг натижа эълон қилинади», — дейилади Саудия Арабистони футбол федерациясининг расмий баёнотида.