«Манчестер Сити»нинг ҳужумкор ярим ҳимоячиси Райан Шерки қишки трансферлар ойнасида Мюнхеннинг «Бавария» клубига ўтмайди. Бу ҳақда журналист Кристиан Фальк хабар берди.

Манбага кўра, «Бавария» қишда Шеркини трансфер қилишдан манфаатдор эмас. ОАВда тарқалган миш-мишларга қарамай, француз футболчиси ҳатто немис грандининг трансфер рўйхатида ҳам бўлмаган. Бу маълумотни «Бавария» спорт директори Макс Эберль журналистга тақдим этган.

Фалькнинг таъкидлашича, «Бавария» умуман январь ойида катта трансферларни амалга оширишни одат қилмаган. Бу режаларга фақат жамоа етакчиларидан бири жиддий жароҳат олган тақдирдагина ўзгариш киритилиши мумкин.

Жорий мавсумда Шерки барча мусобақалар доирасида 6 та учрашувда майдонга тушиб, 2 та гол урди ва 2 та голли узатмани амалга оширди.