«Интер» бош мураббийи Кристиан Киву А Сериянинг 4-турида «Удинезе» устидан қозонилган 5:3 ҳисобидаги ғалаба ҳақида фикр билдирди.

«Биз индивидуал хатолар туфайли голлар ўтказиб юбордик, уларни тузатиш мумкин. Бу борада хавотир олмаяпман. Биз ўйинни суст бошладик, бизга энергия етишмади ва 0:2 ҳисобида ортда қолганимиздан кейингина вазиятга муносабат билдиришимизга тўғри келди.

Биз ишлашимиз керак бўлган аниқ жиҳатлар бор ва ҳар доимгидек, барчасини таҳлил қиламиз. Аммо мени хотиржам қилаётган жиҳат — жамоамизнинг ўзига хос ўйин услуби борлиги.

Биз кўп ишладик, аммо ҳали янада кўпроқ ишлашимиз керак, чунки ҳозирча идеал эмасмиз ва рақибларга дарвозамиз олдида вазиятлар яратиш имконини беряпмиз. Керакли тузатишларни киритиш учун вақтимиз бўлади. Бугун яхши ташкиллашган жамоага қарши ўйинда вазифамизни яхши уддаладик.

Биз ҳар уч кунда ўйнаяпмиз, олдинда эса узоқ мавсум бор. Бизда кучли футболчилардан иборат рақобатбардош таркиб бор ва бизнинг вазифамиз — улар ўз имкониятларини энг яхши тарзда намойиш эта оладиган шароитларни яратиш. Бизга барча футболчилар керак бўлади. Мен учун мураббий сифатида ҳар бир футболчи ўзини ушбу лойиҳанинг бир қисми деб ҳис қилиши муҳим», — деди румин мутахассис DAZN эфирида.