"Арсенал", "Барселона", "Ювентус" ва Франция терма жамоасининг собиқ ҳужумчиси Тьерри Анри фаолияти давомида "Олтин тўп"ни ютишни ўзи учун асосий мақсад қилиб қўймаганини айтди.
"Мен "Олтин тўп"ни ютишим мумкинмиди? Ҳозирги футболчиларга жуда катта ҳурмат билан қарайман. Бизнинг ўз давримиз бор эди ва мен бу совринни қўлга кирита олмадим, бу тўғри.
Болалигимда нималар ҳақида ўйлаганимга назар ташласам, кўпроқ жаҳон чемпионати, Европа чемпионати ва бошқа турнирларда ғалаба қозонишни орзу қилганман", — деди Анри Aminematue TV эфирида.
Франциялик собиқ ҳужумчи профессионал фаолияти давомида барча мусобақаларда 794 та учрашув ўтказиб, 360 та гол урган ва 181 та голли узатмани амалга оширган.
Анри икки марта "Олтин бутса"ни қўлга киритган, тўрт марта Англия Премьер-лигасининг энг яхши тўпурари бўлган.
У 2008/09 йилги мавсумда "Барселона" билан Чемпионлар лигасида ғолиб чиққан. Франция терма жамоаси сафида эса 1998 йилги жаҳон чемпионати ва Евро-2000 совринларини қўлга киритган.
