"Arsenal", "Barselona", "Yuventus" va Fransiya terma jamoasining sobiq hujumchisi Tyerri Anri faoliyati davomida "Oltin to‘p"ni yutishni o‘zi uchun asosiy maqsad qilib qo‘ymaganini aytdi.

"Men "Oltin to‘p"ni yutishim mumkinmidi? Hozirgi futbolchilarga juda katta hurmat bilan qarayman. Bizning o‘z davrimiz bor edi va men bu sovrinni qo‘lga kirita olmadim, bu to‘g‘ri.

Bolaligimda nimalar haqida o‘ylaganimga nazar tashlasam, ko‘proq jahon chempionati, Yevropa chempionati va boshqa turnirlarda g‘alaba qozonishni orzu qilganman", — dedi Anri Aminematue TV efirida.

Fransiyalik sobiq hujumchi professional faoliyati davomida barcha musobaqalarda 794 ta uchrashuv o‘tkazib, 360 ta gol urgan va 181 ta golli uzatmani amalga oshirgan.

Anri ikki marta "Oltin butsa"ni qo‘lga kiritgan, to‘rt marta Angliya Premyer-ligasining eng yaxshi to‘purari bo‘lgan.

U 2008/09 yilgi mavsumda "Barselona" bilan Chempionlar ligasida g‘olib chiqqan. Fransiya terma jamoasi safida esa 1998 yilgi jahon chempionati va Yevro-2000 sovrinlarini qo‘lga kiritgan.