«Манчестер Сити»га нисбатан қўйилган 115 та айблов бўйича қарор ҳали ҳам эълон қилинмаган. Ваҳоланки, Англия Премьер-лигасининг мустақил комиссиясидаги тингловлар 2024 йил декабридаёқ якунланган эди.

Клубга айбловлар 2023 йил февралида қўйилган бўлиб, улар 2009–2018 йиллар оралиғидаги даврни қамраб олади. Даъволар орасида молиявий маълумотларни тўлиқ ва аниқ тақдим этмаслик ҳамда тергов билан ҳамкорлик қилмаслик каби бандлар бор.

Таниқли спорт ҳуқуқшуноси Ник Де Марко жараённинг бу қадар чўзилиб кетганидан норозилигини билдирди.

«Бу ақл бовар қилмас кечикиш. Спорт арбитражининг оддий судларга нисбатан асосий афзалликларидан бири тезкорлик ва самарадорлик экани ҳақида шунча гапирилади», — деди у.

«Манчестер Сити» барча айбловларни изчил ва қатъий равишда рад этиб келмоқда. Клуб ўзининг айбсизлигини тасдиқловчи рад этиб бўлмайдиган далилларга эга эканини таъкидлаган.

Агар комиссия клубни энг жиддий бандлар бўйича айбдор деб топса, «Манчестер Сити»га йирик жарима, 40 дан 60 гача очко олиб ташлаш ёки ҳатто Премьер-лигадан четлатиш каби жазолар қўлланиши мумкин.

Мутахассислар ҳисоб-китобига кўра, икки томоннинг умумий юридик харажатлари 100 миллион фунтдан ошиб кетиши мумкин.