«Manchester Siti»ga nisbatan qo‘yilgan 115 ta ayblov bo‘yicha qaror hali ham e’lon qilinmagan. Vaholanki, Angliya Premyer-ligasining mustaqil komissiyasidagi tinglovlar 2024 yil dekabridayoq yakunlangan edi.

Klubga ayblovlar 2023 yil fevralida qo‘yilgan bo‘lib, ular 2009–2018 yillar oralig‘idagi davrni qamrab oladi. Da’volar orasida moliyaviy ma’lumotlarni to‘liq va aniq taqdim etmaslik hamda tergov bilan hamkorlik qilmaslik kabi bandlar bor.

Taniqli sport huquqshunosi Nik De Marko jarayonning bu qadar cho‘zilib ketganidan noroziligini bildirdi.

«Bu aql bovar qilmas kechikish. Sport arbitrajining oddiy sudlarga nisbatan asosiy afzalliklaridan biri tezkorlik va samaradorlik ekani haqida shuncha gapiriladi», — dedi u.

«Manchester Siti» barcha ayblovlarni izchil va qat’iy ravishda rad etib kelmoqda. Klub o‘zining aybsizligini tasdiqlovchi rad etib bo‘lmaydigan dalillarga ega ekanini ta’kidlagan.

Agar komissiya klubni eng jiddiy bandlar bo‘yicha aybdor deb topsa, «Manchester Siti»ga yirik jarima, 40 dan 60 gacha ochko olib tashlash yoki hatto Premyer-ligadan chetlatish kabi jazolar qo‘llanishi mumkin.

Mutaxassislar hisob-kitobiga ko‘ra, ikki tomonning umumiy yuridik xarajatlari 100 million funtdan oshib ketishi mumkin.