«Манчестер Юнайтед» ярим ҳимоячиси Бруну Фернандеш клуб билан янги шартнома бўйича музокара олиб бормоқда, аммо томонлар ҳозирча келишув муддати борасида бир тўхтамга кела олмаган.
«Қизил иблислар» сардори фаолиятини «Олд Траффорд»да якунлашни истамоқда. Клуб эса унга нисбатан қисқароқ муддатли шартнома таклиф қилмоқчи.
«Манчестер Юнайтед» Брунуга яна бир йилга узайтириш имконияти билан уч йиллик шартнома таклиф қилишга тайёр. Бу ҳолатда португалиялик футболчи клубда 2029 йилга қадар қолиши мумкин. Бироқ унинг вакиллари узоқроқ муддатли кафолатни истамоқда.
Музокараларда молиявий масала ҳам муҳим ўрин тутмоқда. Томонлар футболчининг маошини сезиларли даражада ошириш имкониятини ҳам муҳокама қилмоқда.
Клубдагилар музокаралар боши берк кўчага кириб қолмаганини таъкидламоқда, аммо келишувга эришиш ҳозирча яқин эмас.
«Манчестер Юнайтед» янги шартнома шартларини белгилашда Муҳаммад Салоҳ ва Виржил ван Дейк билан тузилган узоқ муддатли келишувлар тажрибасини ҳам инобатга олмоқда.
