«ПСЖ» ярим ҳимоячиси Сенни Майулу ёзда шартномасини 2031 йилгача узайтирганига қарамай, жорий мавсумда жамоада кам ўйин вақти олаётгани билан ажралиб турибди.
Аввалроқ Луис Энрике 20 ёшли футболчини қўллаб-қувватлаб, шундай деган эди:
«У мен учун муҳим футболчи. У клуб тарбияланувчиси ва жамоага нималар бера олишини кўриш жуда муҳим».
Бироқ Майулу жорий мавсумда атиги 67 дақиқа майдонда ҳаракат қилди. У Лига 1да бир марта асосий таркибда майдонга тушган, яна тўрт учрашувда захирадан ўйинга қўшилган.
«Брест»га қарши сафар ўйини олдидан Луис Энрике вазиятни шундай изоҳлади:
«Бу йил ўйин вақти масаласида бироз бошқача вазият бор, чунки таркибимизда футболчилар сони кўпроқ».
Шундан сўнг Майулу «Брест»га қарши ўйин қайдномасига ҳам киритилмади. У мавсумнинг илк турида «Ренн»га қарши баҳсни ҳам ўтказиб юборган эди.
Футболчининг атрофидагилар эса Луис Энрике билан муносабатларда ҳеч қандай муаммо йўқлигини таъкидламоқда:
«У рақобатни яхши кўради ва ўйнашни истайди. Мураббий қарорларига ишонади. Ҳозирча эса тайёр ҳолатда қолиб, ўз ишини бажармоқда».
Майулу мавсумолди тайёргарлик даврида «Мальорка» ва «Манчестер Юнайтед»га қарши ўйинларда «ПСЖ» сардори сифатида ҳам майдонга тушган. Бироқ ярим ҳимоя чизиғида рақобат кучайгани унга мунтазам ўйин амалиётига эга бўлишни қийинлаштирмоқда.
