«Барселона» сардори Рафинья Диас «Расинг»га қарши 7:2 ҳисобида якунланган учрашувда Ламин Ямалнинг пенальтидан фойдалана олмагани ҳақида фикр билдирди.

Бразилиялик футболчи мазкур баҳсда хет-трик қайд этди ва унинг икки голи пенальтидан урилди. Рафинья 11 метрлик нуқтадан яна бир бор гол уриши мумкин эди, аммо навбатдаги пенальтини бажариш ҳуқуқини Ямалга берди. 19 ёшли футболчи эса меҳмонлар дарвозабонини доғда қолдира олмади.

«Ҳа, Ламин пенальтини голга айлантира олмади, аммо бунинг ҳеч қандай қўрқинчли жойи йўқ. Мен ҳам ўйин давомида голли вазиятлардан фойдалана олмай қоламан.

Ишончим комилки, Ямал келажакда пенальтиларни янада кўпроқ тепади. У кейинги ўйинда албатта яна гол уради», — деди Рафинья.

Учрашув якунига яқин Ямал барибир рақиб дарвозасини ишғол қилди, бу сафар ўйиндан гол урди. Шунингдек, вингер икки марта голли узатма муаллифи бўлди.