"Брайтон" бош мураббийи Фабиан Хюрцелер Англия Лига кубогида "Манчестер Юнайтед" устидан 3:2 ҳисобида қозонилган ғалабадан сўнг фикр билдирди.

"Менимча, ўйинни жуда яхши бошладик. Иккита кераксиз гол ўтказиб юбордик, аммо шунга қарамай ўз режамиздан четга чиқмадик. Бу энг ижобий жиҳатлардан бири бўлди.

Албатта, 0:2 ҳисобида ортда қолаётганда икки йўлдан бирини танлаш мумкин: ё ўйин тугади, деб ҳисоблаб, режадан воз кечиш, ёки ишонишда давом этиш. Жамоадошларга ҳам, ўзингга ҳам ишониш керак.

Ўйин давом этган сари ҳаракатларимиз яхшиланди ва менимча, ғалабага муносиб эдик.

Ўйинни жуда ёмон бошладик, деб ўйламайман. Албатта, голлар ўтказиб юбордик ва бу учрашув сценарийсини ўзгартирди. Аммо умумий ҳисобда тузилмамиз тўғри эди ва майдондаги ўзаро ҳаракатларимиз ҳам яхши чиқди.

Дастлабки дақиқалардаги асосий муаммо кучли ҳаяжон бўлди. Шу сабаб кўп техник хатоларга йўл қўйдик. Кейин эса футболчилар ўйинга мослашиб, ўз ритмини топди.

Якунда учрашувни тўлиқ назорат қилдик ва яна бир нечта гол уриш учун етарлича имконият яратдик", — деди Хюрцелер.