Испаниянинг «Эспаньол» клубида жиддий киберхавфсизлик муаммоси юзага келди. Хакерлар клубнинг чипта ва абонементлар сотиладиган платформасига бузиб кирган.
Энг асосий муаммо — мазкур платформада рўйхатдан ўтган мухлисларнинг шахсий маълумотлари сизиб чиққан бўлиши мумкинлиги.
Ҳужум август ойининг биринчи ярмида содир бўлган, аммо бу ҳақда фақат ҳозир маълум қилинди, дея хабар берди derbyderbyderby.it.
«Фирибгарлик мазмунидаги хабарлар олиш, шахсий маълумотларни ўғирлашга уринишлар ёки клуб, молиявий ташкилотлар ва бошқа таниқли муассасалар номидан юборилгандек кўринадиган ижтимоий муҳандислик усулларидан фойдаланиш хавфи мавжуд», — дея клуб матбуот хизмати асосий хавфни изоҳлади.
«Эспаньол» ушбу ҳолат юзасидан тергов олиб борилаётганини маълум қилди.
