Англия терма жамоасининг собиқ футболчиси ва “Интер Майами” клуби эгаси Девид Бекҳэм аргентиналик ҳужумчи Лионель Месси “Олтин тўп” мукофотига номзодлар қаторидан жой олганини адолатли деб билади. Унинг фикрича, ушбу соврин айнан Мессига насиб қилиши керак.

“Интер Майами” 16 сентябрь, чоршанба куни ўз майдонида Мексиканинг “Крус Асул” клубини мағлуб этиб, Чемпионлар Кубогини қўлга киритди. Учрашувда битта гол ва битта голли узатмага муаллифлик қилган Месси фаолиятидаги 49-титулига эга чиқди. Қолаверса, ушбу гол аргентиналик ҳужумчининг “Интер Майами” либосида киритган юзинчи голи бўлди.

Ўйиндан сўнг MLS телеканали эфирида Девид Бекҳэм Лео ҳақида ўзининг илиқ фикрлари билан ўртоқлашди:

“Унинг шу ерда, Маямида бизнинг жамоамиз учун ўйнаётганига ҳалигача ишонолмайман. Айнан у сабабли ҳар куни машғулотларга келаман, уни кузатаман ва жараёндан завқ оламан. Унинг майдондаги ҳаракатларини, Жаҳон чемпионатини қандай ўтказганини кўрганингизда барчасига амин бўласиз. Унинг яна ‘Олтин тўп’га номзод бўлиши — шунчаки тасодиф ёки омад эмас. У ҳақиқатан ҳам турнирнинг энг яхши ўйинчиси бўлди. Сабаби Лео дахшатли мавсум ўтказди. 39 ёшда Жаҳон чемпионатининг дейрли ҳар бир ўйинига гол уриш — бу ўзгача ҳодиса. Унинг ёшида ҳеч ким бу даражада ўйнай олмайди. Лео ‘Олтин тўп’ даъвогарлари қаторидан жой олишга тўла лойиқ ва менинг фикримча, ушбу мукофотни ҳам Месси олиши керак”.

Маълумот ўрнида, 39 ёшли Месси Испания чемпионати, “Барселона” ва Аргентина терма жамоаси тарихидаги энг яхши тўпурар ҳисобланади. Шунингдек, у футбол тарихида “Олтин тўп”ни саккиз марта қўлга киритган ягона ўйинчидир. Ҳужумчи Аргентина терма жамоаси сафида 207 та ўйинда майдонга тушиб, 125 та гол урган. У миллий жамоа билан бирга икки бор Америка Кубогини (2021, 2024), 2022-йилги Жаҳон чемпионатини ва 2022-йилда “Финалиссима”ни ютган. Бундан ташқари, у 2014- ва 2026-йилги мундиалларда кумуш медалларга эга чиққан.