«Барселона» бош мураббийи Ханс-Дитер Флик матбуот анжуманида жамоанинг дарвозабонлари ҳақида саволларга жавоб берди.

Аввалроқ клуб Жоан Гарсияда ноқулайлик пайдо бўлгани сабабли у маълум муддат майдонга тушмаслигини маълум қилганди.

Асосий дарвозабон «Расинг»га қарши сўнгги ўйинда алмаштирилди ва унинг ўрнига майдонга тушган Войцех Шесни голга олиб келган хатога йўл қўйди.

— Гарсияга дам бериш қарорини ким қабул қилди?

— Биз ҳар доим қарорларни биргаликда қабул қиламиз. Гарсияда жиддий муаммо йўқ. Бироқ шифокорлар ва футболчининг ўзи билан гаплашиб, унга дам беришга қарор қилдик.

— Эртага асосий таркибда Шесни ўйнайдими ёки Ливакович?

— Мураббийлик қарорларимизни ҳеч қачон олдиндан айтмаймиз. Кутинг ва кўрасиз.

— Сўнгги ўйиндан кейин Шесни билан гаплашдингизми? Унинг Ливаковичдан фарқи нимада?

— Ўйиндан кейин Шчесни билан гаплашдим. Ҳар ким хатога йўл қўяди, у ҳам хато қилди. У ўз хатосини тан олди. Ливакович эса бизнинг услубимизга мослашяпти. Аммо у майдонга тушишга тайёр.