«Ювентус»нинг собиқ ҳимоячиси Леонардо Бонуччи 2016 йилда «Манчестер Сити»га ўтиш имкониятини нега рад этганини сўзлаб берди. Ўша пайтда Англия клуби бош мураббийи Пеп Гвардиола италиялик футболчини ўз жамоасида кўришга жиддий қизиққан.

«Менинг ўйин услубимга энг мос мураббий — Гвардиола. У бир неча ҳафта давомида менга катта қизиқиш билдирди. Ишонинг, Гвардиоладек мураббий сизга шунчалик қизиқса, бу алоҳида ҳиссиёт беради.

Бу воқеалар Европа чемпионати пайтида содир бўлган. Мен бутун эътиборимни турнирга қаратишим керак эди, аммо шунга қарамай, ўша вақтнинг ўзида ҳам бу имкониятни муҳокама қилгандик», — дея Бонуччининг сўзларини Goal келтирди.

Шу билан бирга, ҳимоячи учун «Ювентус»ни тарк этиш фикрини қабул қилиш осон бўлмаган. Бонуччи Турин клуби билан Чемпионлар лигаси финалига чиққан ва жамоа билан кучли боғлиқликни ҳис қилган.

«Мен учун «Ювентус»дан кетиш ҳақида ўйлашнинг ўзи оғир эди. Аввалига «АПЛ ва Гвардиола — бу ажойиб имконият», деб ўйлардим. Аммо эртаси куни доим «Ювентус»да ўйнашни орзу қилганимни эслардим», — деди у.

Бонуччининг якуний қарорига оиласидаги вазият ҳам жиддий таъсир кўрсатган. Ўша пайтда унинг икки ёшли ўғли Маттеода жиддий касаллик аниқланган эди.

«Маттеонинг касаллиги, шунингдек, клубни тарк этишга 100 фоиз ишончим бўлмагани қароримга таъсир қилди. Айниқса, раҳбарият менга ҳатто жуда катта таклиф тушса ҳам сотилмаслигимни айтганидан кейин қолиш табиий қарорга айланди», — дея қўшимча қилди Бонуччи.

Леонардо Бонуччи 2024 йилда профессионал футболчилик фаолиятини якунлаган. Ҳозирда у Италия терма жамоаси мураббийлар штабида фаолият олиб бормоқда.