«Арсенал» ҳимоячиси Риккардо Калафьори ижтимоий тармоқларда фаол бўлиб, навбатдаги пости билан футбол мухлислари эътиборини тортди. Италиялик футболчи «Арсенал» базасидаги ошхонадан қисқа видео жойлади.
Видеода болоньезе спагетти солинган ликопчани кўриш мумкин. Калафьори жамоадоши таомга кетчуп қўшганини кўриб, деярли даҳшатга тушгандай муносабат билдирди. Кейинроқ кадрда бу футболчи Кай Хаверц экани маълум бўлди.
«Пастага кетчуп», — деб ёзди Калафьори видео устига ва ғамгин смайлик қўшди.
Видеони муҳокама қилган мухлислардан бири италияликлар ўз миллий таомларидан бири ҳисобланган пастага жуда жиддий муносабатда бўлишини таъкидлади. Шу сабаб Калафьорининг реакциясини тушуниш мумкинлиги қайд этилди.
