«Arsenal» himoyachisi Rikkardo Kalafyori ijtimoiy tarmoqlarda faol bo‘lib, navbatdagi posti bilan futbol muxlislari e’tiborini tortdi. Italiyalik futbolchi «Arsenal» bazasidagi oshxonadan qisqa video joyladi.
Videoda bolonyeze spagetti solingan likopchani ko‘rish mumkin. Kalafyori jamoadoshi taomga ketchup qo‘shganini ko‘rib, deyarli dahshatga tushganday munosabat bildirdi. Keyinroq kadrda bu futbolchi Kay Xavers ekani ma’lum bo‘ldi.
«Pastaga ketchup», — deb yozdi Kalafyori video ustiga va g‘amgin smaylik qo‘shdi.
Videoni muhokama qilgan muxlislardan biri italiyaliklar o‘z milliy taomlaridan biri hisoblangan pastaga juda jiddiy munosabatda bo‘lishini ta’kidladi. Shu sabab Kalafyorining reaksiyasini tushunish mumkinligi qayd etildi.
