«Барселона» ҳужумчиси Рафинья жамоа бош мураббийи Ханс-Дитер Флик сабабли «кўк-анорранглилар» сафида ўйнашда давом этаётганини айтиб берди. Немис мутахассиси клубни 2024 йилдан бери бошқариб келмоқда. Рафинья ўша йили каталонияликлар сафини тарк этишни режалаштирганини тан олди.
«У менинг вазиятга бўлган муносабатимни ўзгартирди. Америка Кубогидан сўнг, у ҳали келмасидан олдин, мен «Барселона»дан кетиш ҳақида жиддий ўйлаган эдим. Ҳаттоки бу бўйича қарор ҳам қабул қилиб бўлгандим, аммо менинг қолишимда у жуда муҳим роль ўйнади», — деди Рафинья Diario SPORT нашрига.
Ушбу мавсумда Рафинья «Барселона» сафида барча турнирларда еттита ўйинда майдонга тушди. Ҳужумчи ҳисобида 11 та урилган гол ва учта голли узатма бор.
