Tuttosport нашри хабарига кўра, «Ювентус» скаутлари ўтган ҳафта «Аталанта» — «Кальяри» ўртасидаги А Серия учрашувида ярим ҳимоячи Алессандро Романони кузатиш учун «Гевисс» стадионига ташриф буюрган.
«Рома»га тегишли бўлган ва айни пайтда «Кальяри»да ижара асосида тўп сураётган 20 ёшли футболчи жорий мавсумда қисқа вақт ичида жамоа ярим ҳимоясининг асосий фигураларидан бирига айланди.
Романо «Кальяри»нинг А Сериядаги дастлабки тўрт ўйинда қўлга киритган учта ғалабасида муҳим роль ўйнади.
Ёш ярим ҳимоячининг муваффақиятли ўйинлари Италия терма жамоаси мураббийлар штаби эътиборидан ҳам четда қолмади. Роберто Манчини уни Миллатлар лигасидаги яқинлашиб келаётган ўйинлар учун миллий жамоага илк бор чақирди.
«Ювентус» Романо трансфери учун жиддий рақобатга дуч келиши мумкин. Чунки футболчига «Интер» ва «Наполи» ҳам қизиқиш билдирмоқда.
