«Барселона» ҳужумчиси Рафинья Ла Лигада кетма-кет икки учрашувда хет-трик қайд этди.

Бразилиялик футболчи аввал «Расинг»га қарши 7:2 ҳисобида якунланган ўйинда учта гол урган бўлса, кейинги турда «Севилья»га қарши 3:1 ҳисобидаги ғалабада ҳам хет-трик муаллифи бўлди.

Рафинья Ла Лигада бундай натижага эришган сўнгги йиллардаги илк футболчи бўлди. Бунгача кетма-кет икки учрашувда хет-трик қайд этган сўнгги ўйинчи «Атлетико» ҳужумчиси Антуан Гризманн бўлиб, у бу натижани 2017/18 мавсумида қайд этган.

Ла Лига тарихида кетма-кет икки ўйинда хет-трик қайд этилган 30 та ҳолат бўлган. «Барселона» футболчилари орасида Рафиньягача бундай натижага фақат Лионель Месси уч марта ва Луис Суарес бир марта эришган.

Ла Лига тарихида эса фақат икки футболчи кетма-кет учта ўйинда хет-трик қайд этган. «Овьедо» ҳужумчиси Исидро Лангара 1934/35 мавсумида, «Атлетик» афсонаси Тельмо Сарра эса 1946/47 мавсумида шундай натижа кўрсатган.