Англия терма жамоаси ярим ҳимоячиси Жуд Беллингем Мадриднинг «Реал» клуби билан янги узоқ муддатли шартнома имзолайди. Бу ҳақда инсайдер Николо Скира ижтимоий тармоқлар орқали маълум қилди.
Журналистга кўра, юлдуз футболчи «қаймоқранглилар» билан ҳамкорликни узайтиришга жуда яқин турибди. Томонлар ўртасидаги янги шартнома 2032 йилгача амал қилиши кутилмоқда.
23 ёшли англиялик футболчи 2023 йил ёзидан буён Мадрид гранди шарафини ҳимоя қилиб келмоқда. Жуднинг амалдаги шартномаси 2029 йил июнь ойи охиригача амал қилади.
Беллингем жорий Ла Лига мавсумида 6 та учрашувда майдонга тушди. Ярим ҳимоячи 3 та гол урди ва 2 та голли узатмани амалга оширди.
