Хави Эрнандес Роналдиньо 2003 йилда "Барселона"га келганидан сўнг жамоанинг менталитетини қандай ўзгартиргани ҳақида гапирди ва бразилиялик футболчининг таъсирини Йохан Кройффники билан қиёслади.
The Prakhar Gupta Xperience лойиҳасига берган интервьюсида Хави Роналдиньо клуб учун оғир даврда жамоага ишончни қайтаргани ва таркибда дунёнинг энг яхши футболчиси бор экан, ғалаба қозониш шарт деган фикрни сингдирганини таъкидлади.
"Роналдиньо бизнинг менталитетимизни Йохан Кройфф билан бир даражада ўзгартирди. У клубга табассум ва завқни қайтарди", — деди Хави.
Шунингдек, у Роналдиньонинг кейинчалик ўйин даражаси пасайиб кетишини фақат базмларга берилиб кетгани билан изоҳлаш нотўғри эканини айтди. Хавининг фикрича, бунда катта совринларни қўлга киритгандан кейинги руҳий ҳолат ҳам муҳим роль ўйнаган.
Роналдиньо "Барселона" сафида икки марта Ла Лига чемпиони бўлган ва 2006 йилда Чемпионлар лигасида ғолиб чиққан.
