А Серия клублари мураббийлари Италия ҳакамлар ассоциацияси вакиллари билан учрашиб, ҳакамликка янгича ёндашувни, хусусан VAR тизими фаолияти ва пенальти белгилаш мезонларини муҳокама қилди.
Янги ёндашувга кўра, ҳакамлар ўйинни камроқ тўхтатиши ва аҳамияти катта бўлмаган қоидабузарликлар учун пенальти белгилашдан тийилиши керак. VAR эса фақат яққол хатолар содир этилган ҳолатларда аралашади. Тўқнашувлар баҳоланганда эса фақат секинлаштирилган такрорларга эмас, балки ҳаракат тезлиги ва контакт кучига ҳам эътибор қаратилади.
Мавсум бошланишидан олдин ҳам ҳакамлар ўйинни аввалгига нисбатан анча динамик ўтказишга урғу бериши, жарима зарбаларини камроқ белгилаши ва айниқса жарима майдони ичидаги баҳсли ҳолатларда қоидабузарликни қайд этишга шошилмаслиги маълум қилинган эди.
Мавсумнинг дастлабки 50 та учрашувида атиги бешта пенальти белгиланди.
А Серия президенти Эцио Симонелли янги ёндашув ўйиндаги фаол вақт миқдорига ижобий таъсир кўрсатганини таъкидлади. Шу билан бирга, айрим жиҳатлар ҳали такомиллаштирилиши кераклигини қайд этди.
