«Порту» ҳужумчиси Саму Агехова оғир жароҳатдан сўнг 223 кун ўтиб майдонга қайтди. Испаниялик футболчи Португалия чемпионати доирасида «Бенфика»га қарши ўтган ва 3:1 ҳисобида якунланган учрашувнинг сўнгги дақиқаларида майдонга тушди.
22 ёшли футболчи февраль ойида ўнг тиззасининг олдинги хочсимон боғламини узиб олган эди.
«223 кундан сўнг мен ҳар доим бўлишни истаган жойимга қайтдим. Бу оғир йўлда мени қўллаб-қувватлагани учун Худога шукр», — деб ёзди Агехова ижтимоий тармоқдаги саҳифасида.
Футболчи, шунингдек, оиласи, дўстлари ва «Порту» мухлисларига меҳр ва қўллаб-қувватлаши учун миннатдорлик билдирди.
«Порту» бош мураббийи Франческо Фариоли клуб тиббий штаби ишини алоҳида эътироф этди.
«Самунинг яна биз билан экани кўп нарсани англатади», — деди Фариоли.
«Порту» миллий чемпионатда 7 та ўйиннинг барчасида ғалаба қозониб, турнир жадвалида пешқадамлик қилмоқда.
