«Севилья» мухлиси «Реал» юлдузи Винисиус Жуниорга нисбатан содир этилган жиддий ирқчилик ҳолати юзасидан бугун, сешанба куни суд олдида жавоб бермоқда. Mundo Deportivo хабарига кўра, унга 1 йилу 9 ойгача озодликдан маҳрум қилиш жазоси тайинланиши мумкин.
Севилья судидаги мазкур жараён воқеадан икки йилдан ортиқ вақт ўтиб бошланди.
Жиноий иш 2023 йилда «Рамон Санчес-Писхуан» стадионида ўтказилган Ла Лига учрашуви билан боғлиқ.
Давлат айбловига кўра, мухлис шимолий трибунанинг майдонга яқин пастки қисмида бўлган ва бразилиялик вингерга бир неча бор ирқий ҳақоратлар қилган.
Телекамералар унинг маймунга ўхшаш ҳаракатлар қилиб, Винисиусга нисбатан ҳақоратли сўзлар бақирганини қайд этган. Ушбу видеотасвирлар тергов учун муҳим далил бўлган.
Испания прокуратураси мухлисга расман «маънавий дахлсизликни бузиш» айбловини қўйган. Айблов томонининг таъкидлашича, унинг ҳаракатлари футболчини атайлаб камситиш, шарманда қилиш ва руҳий азоб етказишга қаратилган.
Ўйиндан кейин «Севилья» раҳбарияти Ла Лига вакиллари билан ҳамкорлик қилиб, ушбу шахсни аниқлаган. Натижада унга стадионга умрбод кириш тақиқланган ва клуб аъзолигидан чиқарилган.
