Франция терма жамоасининг собиқ футболчиси Франк Лебёф «Реал» ва «Барселона» юлдузлари Килиан Мбаппе ҳамда Рафиньяни таққослади.

«Ҳеч ким Рафинья Мбаппедан яхшироқ деб айта олмайди. Чунки Рафинья марказий ҳужумчи позициясида эндигина ўйнай бошлади, Мбаппе эса бу позицияда қарийб ўн йилдан бери барқарор ҳаракат қилиб, голлар урмоқда. Аммо Мбаппенинг майдонда қилаётган ишлари кўпроқ ўзини кўрсатиш учун, Рафинья эса жамоа манфаати учун ҳаракат қилаётгандек туюлади. Муаммо ҳам шунда.

Мбаппе «Олтин тўп»ни ютишни хоҳлашини айтганида, бунинг ўзи кўп нарсани англатди. Мени айнан шу нарса хавотирга солади. «Олтин тўп» ҳақида бундай гапириш керак эмас. Унинг бу совринни қўлга киритиш истагини очиқ айтиши мени ғашимга тегади, чунки бу уни танқид қилаётганларнинг фикрини тасдиқлаётгандек. Уни худбин деб ҳисоблашади ва у буни ўзи ҳам намоён қилмоқда.

«Реал» ёмон ўйнаётган ва ғалаба қозонаётган бўлса-да, у ҳали ҳам «Олтин тўп» ҳақида гапирмоқда. Йўқ. Аввало жамоанг билан ўйинларда ғалаба қозон ва голлар ур. Ла Лига ва Чемпионлар лигасида ғолиб чиқишни хоҳлашингни айт. «Олтин тўп» ҳақида гапиришни бас қил», — деди Лебёф.